菲林極致の多重曝光【Pentax Espio AF Zoom】

【1.Spec】
鏡頭：35-70mm/f4.4-8
快門速度：1/5s -1/400s
對焦模式：自動對焦、0.6m-無限
ISO：25-3200 ／ EV 3-19
配置：內置測光、閃光燈、自動過片、回片、連拍、多重曝光、間距拍攝
電池：1粒CR123A
重量:~235 g
體積：120×65×35 mm
生產日期： 1992年

【2. 簡介】
Pentax 最特別之處應該就係佢嘅多重暴光，簡單啲黎講，你揀咗多重曝光(Multi-exposures)之後，部機唔會自動過片，咁你係同一張菲林上面就可以重疊影兩次、三次甚至無限次咁嘅影像（網上Sample見圖.7，8 ;Credit：@theDarkroom @2brides)

通常都會係一個背景，然後係背景上面重疊影一個主題，咁係第二張相主題以外嘅地方就會變光(白)，咁主題就會被強調，有少少似PS嘅Mask。但係對於多重曝光我都未係菲林上面試過，因為可以做到多種曝光嘅傻瓜機據我所知真係少之又少，呢部應該係我第一部亦都係暫時唯一一部擁有嘅多重曝光傻瓜機。

實質感覺有少少難筆墨形容，可能要大家自己用眼睛感受；強烈建議去youtube睇呢條片，呢類型嘅片簡直係菲林ge soft porn：
片名：Double Exposures with Pentax P & CineStill 800T @viva_la_film

（Espio P同Pentax Espio AF Zoom完全一樣，只係多咗個Panorama(全景)；關於Panorama嘅嘢，之後有機會係其他相機再講。）

會開始涉獵唔同菲林相機好大程度因為呢條片／呢個Channel，菲林個種無法預測同控制嘅未知，係多重曝光下可以話被推到極致。假如每影一次菲林，就係一次放開執著嘅鍛鍊；每影一張多重曝光，就係一次拼貼未知嘅嘗試。

呢個嘗試一定會伴隨住無限次嘅fail，但只要願意不停咁trail＆Error，慢慢就會feel到少少，然後再多少少，慢慢唔經唔覺間，你原来已經掌握甚至愛上個種感覺。或者我哋從來都唔應該指望事情變得容易，而係要期許自己變得更好；當你成功握緊到果種感覺，個張難得嘅成功會俾到你無可替代嘅滿足感。

離一離題，其實都唔算離題，因為呢個page菲林從來都只係一個引子，去打開一我想寫嘅一個topic：近排經歷緊好多轉變：裸辭咗一份人工非常唔錯嘅工、啱啱簽約搬入離島、開始做自己嘅事業。。。每一次面對呢啲選擇嘅時候都無比掙扎；但係比起害怕失敗，我更加害怕變得平庸。。。

【3. 總結】
總括而言，Pentax Espio AF Zoom係一部我十分十分之喜歡嘅相機，靚仔、輕便、成像okay（sample見圖3）、仲有得玩埋重曝；如果我只能擁有一部相機的話，或者我會考慮佢；但如果係咁多部相機中，只能留低一部的話，我都係會揀我認為充滿缺憾嘅Mju2，因為呢部相機陪我經歷咗太多，哈哈。。。

所以雖然講左100次，但係個人認為揀菲林相機甚至做人生嘅重要甚至唔重要決定時，都可以試下唔好make the smart choice, but make the right choice；試下唔好理人哋會點揀，而係問自己假如你80歲睇番自己一生，你會希望嗰個moment你會點揀。#恐懼太常代替人們思考了

～～～
同埋，都係果句啦，揀錯咗又唔係世界末日嘅，特別係喺我哋呢度；因為如果買咗返去真係唔啱心水，我哋呢間35mm.hk會75折回收所有本店出售嘅啲相機，前提係：
1）部機冇穿冇爛（刮花照買）
2）你send3張沖咗嘅相俾我哋貼堂
～～～

【4. 相機評級] 已經入電同菲林測試，整體狀態：A級。
鏡頭：A-
內籠：？（因為仲有菲林係入面，所以冇打開檢查）
外殼：B
手感：A+
便攜性：A
實用性：A++

～～～
⭐️多重曝光小貼士：
如果想影到sample中，突出主體的效果的話
1）先影你想要嘅背景（fill in主題嘅東西，example 圖2嘅花），再影主題（人頭）
2）影主題時，盡量背景揀白色／光嘅地方，咁兩張相重疊時，主題以外嘅東西就會過度曝光而變白（消失）
3）緊記要underexpose，因為多重曝光其實就係喺同一張相上曝光幾次；所以如果雙重曝光的話，就underexpose50%（傻瓜機應該揀multiexpose嘅時候，部機會自動幫你program）。
詳細教學：https://thefindlab.com/2017/08/02/shooting-double-exposures-on-film/
Credit @thefindlab
～～～

🏝睇完鍾意的話就幫手撳個 like 同 follow啦，如果有朋友都鍾意菲林相機就 share 埋俾佢啦，最後如果有任何關於菲林、甚至唔關於菲林機嘅問題都歡迎PM或者留言（人生難題／困擾／煩惱都得，可以當呢度係一個樹窿），唔駛怕麻煩我，因為怕麻煩就唔會整呢個page。
🔥🔥🔥

(P.S. 圖1、2、4、5均非Pentax Smaple，Credit @RediscoverAnalog @simplerose @briandsmithphotography @shutterstock)