神奇老味：【Nikon zoom300AF】

【1. Spec】
鏡頭：35 mm – 70mm/3.5-6.5
快門速度：？
對焦模式：自動對焦、0.6m-無限
ISO：100-1000
配置：內置測光、閃光燈、自動過片、回片
電池：1粒CR123A
重量:~205g
生產日期： 1994年

【2. 簡介】

首先我必須坦白咁同大家講，呢部機市價未必去到$2388；但係如果要我捨得放，必須要去到呢個價錢，我先會考慮。因為呢部係我咁多部菲林機裡面最鍾意嘅一部，返咗香港之後見到carosell有人放都立刻買，亦係我返咗香港後即使有幾十部相機（嗰時未諗開二手菲林相機店），都買嘅唯一一部相機（可惜個部買完返屋企先發現快門有問題。。。）。

我哋相遇於德國科隆郊基於嘅一個隱蔽嘅二手倉庫，既然隱蔽，點解又會咁啱經過？其實唔係咁啱，而係自從保加利亞開始，經過每個城市，我就會特登喺地圖search二手店thrift shop，然後踩過去尋寶。

因為小弟畢業之後就開始咗單車流浪，由香港踩單車去英國利物浦；關於單車流浪嘅故事，之後有機會的繼續分享，而家返返我哋今日主題－我哋嘅神奇老味－Nikon zoom300AF先。

一見到呢部相機立刻愛上咗佢，但係入電測試，冇反應開唔到機，個種失落係難以用筆墨形容；正常其他嘅相機我應該一早放棄咗，因為當時正值歐洲冬天，日照時間短，同埋每日都要趕路去新嘅城市Couchsurf，係每個地點可以停留嘅時間唔多。

但係我真係完全唔捨得放低呢部相機，我都解釋唔到點解；又好好彩呢個倉庫超級大，揀咗接近半個鐘咗右，最後買咗5、6部相機。臨走時諗緊買唔買埋佢，再入多一次電入去試，竟然開得著部機！但係快門同變焦都係無反應。

因為單車Pannier位置有限，所以我原本嘅原則係，只有100%work嘅相機，我先會買；但係實在太太太鍾意呢部相機，都係買咗；夜晚去到Duisburg個Host到整理戰利品時，入電時快門竟然有反應啦！可惜都仲係未zoom到…但係我個Host－Darshan攞上手，撳咗兩吓呀，竟然zoom到阿！個種失而復得嘅感覺同樣地係難以用筆墨形容。

【3. 總結】
用Nikon Zoom300影嘅呢卷菲林係痴咗線咁靚！要我係裡面淨係揀3張真係超級超級難！佢嘅鏡頭銳利度、顏色、甚至直影強光、逆光嘅flare全部都令我極度驚艷，有啲原本我實驗性質影，以為9成會fail嘅相，竟然全部都大成功。

好坦白咁講，即使而家我影相進步咗唔少，再加埋用fujifilm高階無反、再tune埋fuji recipe、再無限開火係咁影，都唔一定影得返呢種純粹同味道。每次我想完全放棄菲林時，總係有呢啲moment令我唔捨得放手。

幾經辛苦下，揀咗3張sample俾大家睇：1）Panorama下電影嘅超強烈電影感（圖8）、2）正常相機9成fail、超強逆光捕捉嘅magic moment；同菲林獨有捕捉光與影嘅Dynamic Range（圖9）、呢部相機個鏡頭嘅色水（圖10）；更多sample請參考遲啲post嘅story。

簡單而言，咩人最契合呢部機呢？我！一定係我！我一定係最契合佢嘅人！所以先會定呢個趕客價錢，我好想同大家分享呢部相機，但係又唔係好想呢部相機離開我；因為36張相入面，幾乎冇一張係我唔鍾意的。但係如果你真係好鍾意好鍾意的話，可以PM我，我會send多啲sample相俾你考慮，你就會明白點解我咁鍾意咁鍾意呢部相機。

～～～
如果有任何關於菲林相機嘅問題，歡迎隨時留言／PM，我好期待同大家瘋狂討論；老實講，呢個page『賣』相機只係其次，相機只係我哋展開嘅話題而已；畢竟如果淨係要賣嘢，就咁放Carosell已經搞掂，但係我想試下做唔做到嘅係建立一個屬於香港菲林人嘅archieve同community。

ANY肥，大家如果想買菲林相機，相信你嘅直覺，follow your heart咁揀就okay；畢竟，如果買咗返去真係唔啱心水，我哋呢間35mm.hk會75折回收所有本店出售嘅啲相機，前提係：
1）部機冇穿冇爛（刮花照買）
2）你send5張沖咗嘅相俾我哋貼堂
～～～

【4. 相機評級】
已經入電同菲林測試，整體狀態：A+級。
鏡頭：A+
內籠：A+
外殼：B
手感：A++
便攜性：A
實用性：A+++